<h3>بغیر ٹو پی کے نماز پڑھنا کیسا ہے ؟</h3> کیا فرماتے ہیں علمائے کرام اس بارے میں کہ ننگے سر نماز پڑھنا کیسا ہے؟ سائل :حافظ سلطان عطاری <span style="color: #ff0000;"><strong>الجوابــــــــــــ بعون الملک الوھّاب</strong></span> نمازی کے لئے افضل تو یہی ہے کہ عمامہ شریف یا ٹوپی پہن کر ہی نماز اداکرے کیونکہ ننگے سر نماز پڑھنا خلاف سنت ہے، اور فقہائے کرام نے اس کی تین اقسام بیان فرمائ ہیں، سُستی سے ننگے سر نماز پڑھنا(یعنی: ٹوپی پہننا بوجھ معلوم ہوتا ہو یا گرمی معلوم ہوتی ہو تویہ مکروہ تنزیہی ہے، اور اگر تحقیر نماز مقصود ہے، مثلاً نماز کوئی ایسی مُہْتَم بالشان چیز نہیں جس کے لیے ٹوپی یا عمامہ پہنا جائے تو یہ کفر ہے، اور خشوع خُضوع کے لیے ننگے سر نماز پڑھی تو مستحب ہے . امام اہلسنت مجدد دین و ملت سیدی اعلیٰ حضرت امام احمد رضا خان رحمۃ اللہ تعالیٰ علیہ تحریر فرماتے ہیں، کہ حضور اقدس ﷺ کی سنت کریمہ نماز مع کلاہ و عمامہ ہے، اور فقہائے کرام نے ننگے سر نماز پڑھنے کی تین قسم کی ہے(1)اگر بہ نیت تواضع وعاجزی ہو تو جائز ہے(2) اور بوجہ کسل(یعنی سُستی ہو تو مکروہ(3)اور معاذﷲ نماز کو بے قدر اور ہلکا سمجھ کر ہو تو کفر ہے . (فتاویٰ رضویہ جلد7صفحہ389- رضا فاؤنڈیشن لاہور) واللہ اعلم عزوجل و رسولہ اعلم ﷺ <span style="color: #ff0000;"><strong>کتبـــــــــہ : ابورضا محمد عمران عطاری مدنی عفی عنہ</strong></span>