<h3>بغیر گواہوں کے نکاح کرنا کیسا ہے؟</h3> سوال : کیا صرف لڑکا اور لڑکی آپس میں بغیر گواہوں کے نکاح کر سکتے ہیں؟ اگر کسی نے ایسا کیا تو کیا حکم ہے نکاح ہوگا یا نہیں مدلل جواب عنایت فرمائیں مہربانی ہوگی؟ سائل : نعیم نوری مالیگاؤں <span style="color: #ff0000;"><strong>الجواب اللھم ھدایۃ الحق والصواب</strong></span> صورت مسئولہ میں بغیر گواہوں کے نکاح نہیں ہو سکتا نکاح میں گواہی شرط ہے. اب چاہے دو مرد گواہ ہوں یا ایک مرد اور دو عورتیں بغیر گواہوں کے نکاح فاسد ہے اگر کسی نے ایسا کیا تو لڑکا، لڑکی پر لازم ہے کہ فورا جدا ہو جائیں اور شرعی طور پر گواہوں کی موجودگی میں نکاح کریں فتح القدیر میں ہے : ولا ینعقد نکاح المسلمین إلا بحضور شاہدین عاقلین بالغین مسلمین الخ، أما اشتراط الشہادة فلقولہ علیہ السلام: لا نکاح إلا بشہود۔ ہاں گواہوں کی موجودگی میں حد بلوغت کو پہونچے لڑکا،لڑکی خود نکاح کر سکتے ہیں حضور صدرالشریعہ علامہ مفتی امجد علی اعظمی رضی اللہ تعالیٰ عنہ تحریر فرماتے ہیں کہ عورت سے کہا تو میری ہو گئ، اس نے کہا ہاں یا میں تیری ہوگئ یا عورت سے کہا بعوض اتنے کے میری عورت ہو جا، اس نے قبول کیا یا عورت نے مرد سے کہا میں نے تجھ سے اپنی شادی کی مرد نے قبول کیا یا مرد نے عورت سے کہا تونے اپنے کو میری عورت کیا، اس نے کہا کیا تو ان سب صورتوں میں نکاح ہو جائےگا ( بہار شریعت ج ٢ ص ۹ نکاح کا بیان) الحاصل ....نکاح کے منعقد ہونے کے لئے شرط یہ ہے کہ دو عاقل بالغ مرد یا ایک مرد اور دو عورتوں کی موجودگی میں ایجاب و قبول ہو۔اگر بغیر گواہوں کے موجودگی کے کسی نے ایجاب و قبول کر لیا تو اس سے نکاح منعقد نہیں ہوتا اور دونوں میاں بیوی نہیں بن جاتے بلکہ اجنبی ہی رہتے ہیں.. وَاللہُ اَعْلَمُ وَ رَسُوْلُہٗ اَعْلَم عَزَّوَجَلَّ وَ صَلَّی اللّٰہُ تَعَالی علیہ وسلم <span style="color: #339966;"><strong>محمدرضا مرکزی</strong></span> <span style="color: #339966;"><strong>خادم التدریس والافتا</strong></span> <span style="color: #339966;"><strong>الجامعۃ القادریہ نجم العلوم مالیگاؤں</strong></span>