<h2>بینک سے سودی قرض لینا کیسا ہے ؟ Bank se loan lena kaisa hai</h2> کیا فرماتے ہیں علمائے کرام ومفتیان عظام بڑی بڑی تجارتوں اور بس ، ٹرک وغیرہ کی خریداری کے لیے بینک <strong><a href="https://masailworld.com/bank-se-intrest-lena-kaisa-hai/" target="_blank" rel="noopener">سودی قرض</a> </strong>لینا پڑتا ہے ورنہ اس سے زیادہ سرمایہ سیل ٹیکس اور انکم ٹیکس میں ضائع ہوجائے گا ۔ تو کیا ایسی مجبوری کی صورت میں بینک سے سودی قرض لینا جائز ہے؟ <span style="color: #ff0000;"><strong>الجوابــــــــــــــــــــــــــــــــــــ</strong></span> سیل ٹیکس اور انکم ٹیکس کے ضرر اور اس کی تباہ کاری سے بچنے کی ضرورت اور مفسدہ مظنونہ( معاشی زبوں حالی ، اور تعلیمی و ثقافتی وسیاسی انحطاط) کے ازالہ کے لیے بینک سودی قرض لینا جائز ہے کہ یہ فی الواقع اپنے مال کو ضیاع سے بچانا ہے ، نیز ضرر اشد سے تحفظ کے لیے ضرر اخف کا ارتکاب ہے ۔ البتہ اس کے لیے درج ذیل شرائط کی پابندی لازم ہے ۔ <strong>(1)</strong> بنام انٹریسٹ، جتنی رقم زائد دینی پڑے وہ سیل ٹیکس اور انکم ٹیکس کی عائد ہونے والی رقم سے کم ہو ۔ <strong>(2)</strong> ممکنہ حد تک جلد از جلد قرض کی جملہ رقم ادا کردی جائے، کوئی قرض ناغہ نہ ہو جس کی بنا پر مزید اضافی رقم دینے کی نوبت آئے ۔ <strong>(3)</strong> اعتقاد یہی رکھے کہ قرض پر یہ زائد رقم بوجہ مجبوری دے رہا ہے اور اسے دل سے برا ہی جانے یہ نہیں کہ <strong>" اجازت بوجہ مجبور"</strong> کو اصل مباح سمجھ کر بغیر کسی ناگواری کے بطیب خاطر ایسے قرض کا لین دین جاری کرے ۔ <strong>(4)</strong> قرض اتنا ہی لے جتنے سے اس کی حاجت پوری ہوسکے کہ بوجہ حاجت جو اجازت ہوتی ہے وہ بقدر حاجت ہوتی ہے ۔ ان شرائط کی رعایت کے ساتھ بس، ٹرک وغیرہ کی خریداری اور فروغ معاش کے لیے بینک سے قرض لینے کی اجازت ہے ۔ ورنہ نہیں ۔ والله تعالى اعلم بالصواب ۔ <span style="color: #339966;"><strong>کتبــــــــــــہ : مفتی نظام الدین رضوی جامعہ اشرفیہ مبارک پور </strong></span>