<h2 style="text-align: center;">تِرا ہی نام ہر دل کی صدا ہے</h2>   <p style="text-align: center;">تِرے ہی واسطے حمد و ثنا ہے تِری ہی یاد بہتر تذکرہ ہے</p> <p style="text-align: center;"> تو ہی کونین کا مشکل کشا ہے تِرا ہی نام ہر دل کی صدا ہے</p> <p style="text-align: center;"> تِرا ہی نور ہے ارض وسما میں زماں سے اور مکاں سے ماورا ہے</p> <p style="text-align: center;"> تِری پاکی ہے سب عیبوں سے مولا! تِری ہی ذات ہر شَے سے جدا ہے</p> <p style="text-align: center;"> تو ہی غفار ہے قہار تو ہے تو ہی ستّار اے میرے خدا ہے</p> <p style="text-align: center;"> تِری ذات و صفات ایسی ہیں جن کی نہ کوئی ابتدا نہ انتہا ہے</p> <p style="text-align: center;"> تِرا ہی نام لے لے کر کھلیں گل تِرا ہی ذکر بلبل کی صدا ہے</p> <p style="text-align: center;"> مُبَرّہ ہے جہت اور وقت سے تو یہی تو قمریوں کا چہچہا ہے</p> <p style="text-align: center;"> گنہگاروں کو بھی روزی تو ہی دے یہ تیرا فضل اور تیری عطا ہے</p> <p style="text-align: center;"> تِرا ہی فضل ہے مولا ہمیشہ ہمیں ایمان کی حاصل ضیا ہے</p> <p style="text-align: center;"> فضائیں کر رہی ہیں حمد تیری تِری تعریف میں ہر دم ہوا ہے</p> <p style="text-align: center;"> تو خلاقِ دو عالم ہے خدایا! ہر اک مخلوق پر تیری دَیا ہے</p> <p style="text-align: center;"> یگانہ ہے تو اپنی ذات میں اور تِرا ہر وصف وصفِ کبریا ہے</p> <p style="text-align: center;"> شہِ کونین کو دنیا میں بھیجا تِرا احسان یہ سب سے بڑا ہے</p> <p style="text-align: center;"> مجھے طیبہ میں تو مدفن عطا کر دلِ سرورؔ کی بس یہ التجا ہے</p>   منتخب مدائح از: مولانا عبداللہ سرورؔ اعظمی نجمی مدرس: جامعہ حرا نجم العلوم، مہاپولی مدیر: ماڈرن پرنٹرس، ممبئی ۔