<h2>داڑھی مونڈنے کی اجرت لینا کیسا ہے؟</h2> سوال : کیا فرماتے ہیں علمائے دین و مفتیان شرع متین مسئلہ ذیل میں کہ زید قوم کا نائ اور مسلمان ہے لیکن وہ شخص مسلمان اور غیر مسلم کی داڑھیاں بناتا ہے. لہذا ایسی صورت میں زید کے گھر کھانا پینا درست ہے یا نہیں جو شریعت کا حکم ہو تحریر فرمائیں؟ <span style="color: #ff0000;"><strong>الجوابــــــــــــــــــ</strong></span> مسلمان نائی کے لیے داڑھی مونڈنے کی اجرت لینا حرام ہے. وجہ یہ ہے کہ داڑھی مونڈنا اور منڈانا حرام ہے اور حرام و ناجائز کام پر اجرت لینا بھی حرام و ناجائز ہے. در مختار باب الاجارہ الفاسدہ میں ہے <span style="color: #ff0000;"><strong>'' ولا تصح الاجارۃ لاجل المعاصی مثل الغناء والنوح والملاھی ''</strong></span> (جلد ٦ صفحہ ٥٥) اور البحر الرائق میں ہے <span style="color: #ff0000;"><strong>'' وان اعطاھا الاجر لا یحل لہ ویجب علیہ ردہ علی صاحبہ ''</strong></span> ١ھ. (جلد ٨ صفحہ ٢٠) یہ شخص اگر عین اسی مال حرام سے کھلائے تو نہ کھائیں، لیکن جب اس کا مال حلال وحرام دونوں طرح کا ہے اور دونوں باہم مخلوط ہوتا ہے تو یہ معلوم ہی نہیں ہو سکتا کہ خاص مال حرام سے ضیافت کا انتظام ہوا ہے. علاوہ ازیں اجرت میں روپے پیسے ملتے ہیں جو خود کھائے نہیں جاتے بلکہ ان سے کوئی چیز مطعومات مشروبات سے خریدی جاتی ہے جس پر عموماً عقد و نقد جمع نہیں ہوتے اس لیے اس کے یہاں کھانا مال حرام کھانا نہیں. تاہم علماء، حفاظ اور ائمہ وقراء کو اس کے یہاں کھانے سے احتراز کرنا چاہیے تاکہ اس سے لوگوں کو عبرت حاصل ہو. واللہ تعالی اعلم ۔ <span style="color: #339966;"><strong>کتبہ : مفتی محمد نیاز احمد برکاتی</strong></span> <span style="color: #339966;"><strong>الجواب صحیح : مفتی نظام الدین رضوی جامعہ اشرفیہ مبارکپور</strong></span>