اپنی بات نہ ماننے والے کو شیطان سے تشبیہ دینا کیسا ہے از مفتی محمد ارشاد علیمی

باسمه تعالى وتقدس الجواب بعون الهادى الى الحق والصواب: مسجد میں کوئی چیز دینا باعث اجر و ثواب ہے نہ دینے پر کوئی گناہ نہیں۔ برتقدیر صدق سوال مولوی مذکور فی السوال(ایک امام وخطیب کو ایسی نازیبا حرکات جن سے وقار علما مجروح ہو زیب نہیں دیتیں، ان سے اجتناب لازم ہے) کا اپنے اور اپنے ساتھیوں معراج دین اور جہانگیر احمد کے حکم کی خلاف ورزی کرنے والوں کو ابلیس کی طرح راندہ ہوا قرار دینا ہرگز ہرگز درست نہیں، مولوی مذکور اور انکے ساتھیوں بشرطیکہ وہ اس کی بات پر راضی ہوں نے یہ کہہ کر مسلمانوں کی دل آزاری کی ہے، ان کو چاہیے کہ جنکی کی دل آزاری کی ہے ان سے معافی مانگیں، نیز اللہ رب العزت کی بارگاہ میں توبہ صادقہ کریں ورنہ حقوق العباد میں گرفتار ہوکر مستحق غضب جبار وعذاب نار ہوں گے۔ حضورﷺ کا فرمان مبارک ہے: مَنْ اٰذٰی مُسْلِمًا فَقَدْ اٰذَانِیْ وَ مَنْ اٰذَانِیْ فَقَدْ اٰذَی الله” جس نے کسی مسلمان کو تکلیف دی اس نے مجھے تکلیف دی اور جس نے مجھے تکلیف دی اس نے اللہ تعالیٰ کو تکلیف دی۔(المعجم الاوسط للطبرانی/ ج۴ ص ۶۱/ المکتبۃ الشیعیۃ) یعنی جس نے اللہ تعالیٰ کو تکلیف دی بالآخر اللہ تعالیٰ اسے عذاب میں گرفتار فرمائے گا۔ نیز فرمان مبارک ہے: “لَیْسَ مِنَّا مَنْ غَشَّ مُسْلِمًا اَوْضَرَّہٗ اَوْمَاکَرَہٗ” وہ شخص ہمارے گروہ میں سے نہیں ہے جو مسلمان کو دھوکا دے یا تکلیف پہنچائے یا اس کے ساتھ مکر وفریب کرے۔ (کنزالعمال/ کتاب الاخلاق/ج ۲ ص ۲۱۸/بیروت،لبنان) حضور محدث اعظم پاکستان علامہ سردار احمد چشتی قادری نور اللہ مرقدہ علما و مبلغین کو ہدایات فرماتے ہوئے رقمطراز ہیں: “(۱)وقار علم وعلماء کو ہمیشہ مد نظر رکھیں کوئی ایسا کام نہ کریں کہ وقار علماء مجروح ہو۔ (۲)آپ دین کے مبلغ اور ترجمان ہیں آپ کا کردار بے داغ ہونا چاہیے۔(۳)دنیاداروں سے بے تکلفانہ روابط قائم نہ کریں۔(۴)بے ضرورت بازار میں نہ جائیں اور نہ کسی دکان پر بیٹھیں۔(۵)آپ ہوں اور کتابوں کا مطالعہ۔(۶)بیان ٹھوس کریں۔مسئلہ جو بیان کریں اس کا ثبوت تحقیقا یا الزاما آپ کے پاس ہو۔(۷)لباس ہمیشہ اجلا اور اعلی پہنیں۔(۸)شیروانی استعمال کریں اس سے علماء کا وقار بلند ہوتا ہے۔(۹)عمدہ جوتا استعمال کریں تاکہ دنیاداروں کی نگاہ عالم کے جوتوں پر رہے۔(۱۰)نمازیوں سے اخلاق سے پیش آئیں۔(۱۱) جو سنی دھوکے میں ہیں انکی اصلاح کی کوشش جاری رکھیں “(حیات محدث اعظم ص۸۴تا ۸۵/ناشر: رضا فاؤنڈیشن جامعہ نظامیہ رضویہ،اندرون لوہاری گیٹ،لاہور) والله تعالى أعلم بالصواب کتبہ:۔ محمد ارشاد رضا علیمیؔ عفی عنہ خادم دار العلوم رضویہ اشرفیہ ایتی راجوری جموں وکشمیر ۱۰/ربیع الاول ۱۴۴۷ھ مطابق ۴/ستمبر ۲۰۲۵ء الجواب صحیح محمد نظام الدین قادری خادم درس وافتا دار العلوم علیمیہ جمدا شاہی بستی یوپی