<h3>اپنے لڑکے کا نکاح بیوی کی اس لڑکی سے جو دوسرے شوہر سے ہے کر سکتے ہیں یا نہیں؟</h3> سوال : کیا فرماتے ہیں علمائے دین و مفتیان کرام مسئلہ ذیل میں کہ زید کا انتقال ہو گیا اس کے نطفے سے تین لڑکیاں اور دو لڑکے ہیں. زید کی بیوی ہندہ نے بکر سے شادی کی اور بکر کی بیوی شبینہ سے تین لڑکے اور دو لڑکیاں ہیں. بکر نے شبینہ کے ہوتے ہوئے ہندہ سے شادی کرلی اور اپنے بڑے لڑکے کا نکاح جو کہ شبینہ کے بطن سے ہے زید مرحوم کی بڑی لڑکی جو ہندہ کے بطن سے ہے کردیا ہے تو کیا یہ جائز ہے؟ کہ بکر بھی اس لڑکی کی ماں سے شادی کر کے اسی گھر میں رہے اور بکر اپنی پہلی بیوی کے لڑکے ہندہ سے جو بکر کی دوسری بیوی ہے اس کی لڑکی سے شادی کر کے اسی گھر میں رکھے. قرآن و حدیث کی روشنی میں مدلل و مفصل جواب عنایت فرمائیں. <span style="color: #ff0000;"><strong>الجوابــــــــــــــــــــــــــــــ</strong></span> صورت مسئولہ میں ہندہ کی لڑکی کا نکاح ہندہ کے شوہر ثانی بکرکے اس لڑکے کے ساتھ کرنا جو شبینہ کے بطن سے ہے جائز ہے. فتاویٰ عالمگیری باب المحرمات میں ہے <strong><span style="color: #ff0000;">'' لا باس بان یتزوج الرجل امراۃ ویتزوج ابنہ ابنتھا او امھا کذا فی محیط السرخسی (ج ١ صفحہ ٢٢٧)</span></strong> وجہ یہ ہے کہ وہ محرمات میں سے نہیں اللہ تبارک و تعالی ارشاد فرماتا ہے <span style="color: #ff0000;"><strong>'' واحل لکم ما وراء ذلکم</strong></span> (پارہ ٥ آیت ٢٤) اور جب ان کا نکاح شرعاً درست ہے تو اپنے والدین کے ساتھ ایک ہی مکان میں رہنے میں بھی کوئی حرج نہیں ۔ واللہ تعالی اعلم ۔ <span style="color: #339966;"><strong>کتبہ : مفتی شمس الدین احمد علیمی</strong></span> <span style="color: #339966;"><strong>الجواب صحیح : مفتی نظام الدین رضوی جامعہ اشرفیہ مبارکپور</strong></span>