<h2>غسل کی حاجت ہو اور فجر کا وقت تنگ ہو تو کیا تیمم جائز ہے؟</h2> سوال :ایک شخص کو غسل کی حاجت ہے اتفاق سے اس کی آنکھ ایسے وقت کھلی جب کہ فجر کی نماز کا وقت بہت تنگ ہو گیا کہ اگر غسل کرے تو نماز قضا ہو جائے گی. تو کیا ایسا شخص غسل کا تیمم کر کے نماز پڑھ سکتا ہے؟ <span style="color: #ff0000;"><strong>الجوابـــــــــــــــــــــــــ</strong></span> جب کہ نماز کا وقت اتنا تنگ ہو گیا کہ جلدی سے غسل کرکے نماز نہیں پڑھ سکتا تو اگر جسم پر کہیں نجاست لگی ہو تو اسے دھو کر غسل کا تیمم کرے اور وضو بنا کر نماز پڑھ لے. پھر غسل کرے اور سورج بلند ہونے کے بعد نماز دوبارہ پڑھے. ایسا ہی فتاوی رضویہ جلد اول صفحہ 584 میں ہے. مگر یہ اس صورت میں ہے جب کہ کلی کرنے، ناک میں پانی ڈالنے اور سارے بدن پر پانی بہانے کے بعد دو رکعت فرض پڑھنے بھر کا بھی وقت نہیں ہے اور اگر اتنا وقت ہے لیکن صابن وغیرہ لگا کر اہتمام سے نہانے بھر کا وقت نہیں ہے تو فرض ہے کہ صابن وغیرہ کے بغیر غسل کے نماز پڑھے. اس صورت میں اگر تیمم کر کے نماز پڑھی تو سخت گناہ گار ہوگا. واللہ تعالی اعلم ۔ <span style="color: #339966;"><strong>کتبہ : مفتی جلال الدین احمد الامجدی</strong></span> <span style="color: #339966;"><strong>ماخوذ از فتاویٰ فیض الرسول جلد 1 صفحہ ١٧١</strong></span>