منقبت وارث پاک رحمۃ اللہ علیہ | گلِ باغِ علی ، حاجی وارث علی

قدوۃ السالکین، زبدۃ العارفین ، بانیِ سلسلہ عالیہ وارثیہ، امام الاولیاء، آل سید الشہداء امامِ حسین حضرت حاجی حافظ سید وارث علی شاہ رحمۃ اللہ علیہ۔ ۔۔۔

گلِ باغِ علی ، حاجی وارث علی مہکے دل کی کلی حاجی وارث علی

میں بھی مخمورِ چشمِ ولایت رہوں اک نگاہِ جلی ! حاجی وارث علی

غنچۂِ ذکر تیرا کھلا ہے جہاں بادِ رحمت چلی حاجی وارث علی

ہو معطر ، ترے مشکِ فیضان سے آرزو کی گلی حاجی وارث علی

سائبانِ دعا جس پہ چھایا ترا دھوپ ، غم کی ٹلی حاجی وارث علی

سارا جگ تیری عظمت کا ہے معترف کہتے ہیں سب ولی حاجی وارث علی

نظمِ سیفی پہ ہے یہ بہارِ کرم کیا ہی پھولی پھلی حاجی وارث علی