امام کو گالی دی تو اس کی اقتدا میں پڑھی گئی نماز ہوگی یا نہیں؟
اَلــسَــلامُ عَــلَــيْــكُــمْ وَرَحْــمَــةُ الــلّٰــهِ وَبَــرَكَــاتُــهْ
کیا فرماتے ہیں علماۓ دین مسئلہ ذیل کے بارے میں کہ اگر کوئی مقتدی اپنے امام کی برائی کرتا ہے اور امام کے لیئےغلیظ اور بیہودہ الفاظ استعمال کرتا ہے تو کیا ایسے شخص نے جو نمازیں اس امام کی اقتدا میں ادا کی ہیں کیا ان نمازوں میں کوئی فرق آۓ گا اور ایسے شخص کے بارے میں شریعت کا کیا حکم ہےمدلل جواب عنايت فرمایٸں؟ بینوا تو جروا
المستفتی ۔ _مـــحـــمـــود احـــمـــد قـــادری جـــامـــعـــی مـــہـــنـــڈر پـــونـــچـــھ جـــمـــوں وکـــشـــمـــیـــر الـــہـــنـــد
الجواب:
حدیث شریف میں ہے: ” انما جعل الامام لیوتم بہ”(ترمذی شریف) یعنی: امام اس لیے بنایا گیا ہے تاکہ اس کی پیروی کی جائے۔ اسی لیے اگر کئی لوگ قابلِ امامت موجود ہوں، تو جو اُن حاضرین میں افضل وبہتر ہو وہ امامت کا زیادہ حق دار ہوتا ہے، جس کی ترتیب بھی فقہائے کرام رحمہم اللہ تعالی نے بیان فرمادی ہے۔ حضرت صدر الشریعہ علیہ الرحمہ تحریر فرماتے ہیں:
“سب سے زیادہ مستحق اِمامت وہ شخص ہے جو نماز و طہارت کے احکام کو سب سے زیادہ جانتا ہو، اگرچہ باقی علوم میں پوری دستگاہ نہ رکھتا ہو، بشرطیکہ اتنا قرآن یاد ہو کہ بطور مسنون پڑھے، اور صحیح پڑھتا ہو، یعنی حروف مخارج سے ادا کرتا ہو ، اور مذہب کی کچھ خرابی نہ رکھتا ہو، اور فواحش سے بچتا ہو، اس کے بعد وہ شخص جو تجوید (قراءت) کا زیادہ علم رکھتا ہو اور اس کے موافق ادا کرتا ہو۔ اگر کئی شخص ان باتوں میں برابر ہوں ، تو وہ کہ زیادہ ورع رکھتا ہو، یعنی حرام تو حرام شبہات سے بھی بچتا ہو، اس میں بھی برابر ہوں ، تو زیادہ عمر والا، یعنی جس کو زیادہ زمانہ اسلام میں گزرا، اس میں بھی برابر ہوں ، تو جس کے اخلاق زیادہ اچھے ہوں ، اس میں بھی برابر ہوں ، تو زیادہ وجاہت والا، یعنی تہجد گزار ، کہ تہجد کی کثرت سے آدمی کا چہرہ زیادہ خوبصورت ہوجاتا ہے، پھر زیادہ خوب صورت ، پھر زیادہ حسب والا، پھر وہ کہ باعتبار نسب کے زیادہ شریف ہو، پھر زیادہ مالدار، پھر زیادہ عزت والا، پھر وہ جس کے کپڑے زیادہ ستھرے ہوں ۔ غرض چند شخص برابر کے ہوں ، تو ان میں جو شرعی ترجیح رکھتا ہو زیادہ حق دار ہے اور اگر ترجیح نہ ہو تو قرعہ ڈالا جائے، جس کے نام کا قرعہ نکلے وہ اِمامت کرے، یا ان میں سے جماعت جس کو منتخب کرے وہ امام ہو ۔اور جماعت میں اختلاف ہو تو جس طرف زیادہ لوگ ہوں وہ امام ہو۔ اور جماعت نے غیر اولیٰ کو امام بنایا، تو بُرا کیا، مگر گنہگار نہ ہوئے”(بہارِ شریعت ح٣ ص۵٧١ )
مذکورہ بالا اقتباس سے واضح ہے کہ امام، شرعی اعتبار سے محترم ہوتا ہے۔ لہذا مقتدیوں کو چاہیے کہ امام کا احترام کریں، ہاں! اگر امام جامعِ شرائطِ امامت نہ ہو تو ایسے کو امام نہیں بنایا جائے گا اور اس کی ایسی خرابیوں کو بھی بیان کرنے میں حرج نہیں ،جن کی وجہ سے اس کی امامت میں شرعی خلل ہو، مثلاً: گمراہ یا فاسق ہے، یا قراءت ایسی ہو جس سے نماز فاسد ہو، یا طہارت ونماز کے ضروری مسائل سے بے خبر اور غافل ہو۔
اور غلیظ اور بے ہودہ الفاظ کا استعمال توکسی کے بارے میں بھی نہیں چاہیے، چہ جائیکہ اس محترم شخص کے لیے جس کو نماز میں امام بنایا ہے۔ اعلی حضرت امام احمد رضا قدس سرہ العزیز تحریر فرماتے ہیں:
“اور بد مذہب وگمراہ اگرچہ عالم کہلاتا ہو اسے برا کہا جائے گا، مگر اسی قدر جتنے کا وہ مستحق ہے اور فحش کلمہ سے ہمیشہ اجتناب چاہیے” (فتاوی رضویہ ج ٩ نصف آخر ص٣١٦)
اور آدمی جس امام کے پیچھے نمازیں پڑھتا ہے اس کو برا کہنا بالخصوص اس کے لیے غلیظ اور بے ہودہ الفاظ استعمال کرنا نہایت شنیع اور حد درجہ ناپسندیدہ اور گناہ کا کام ہے اور اس وجہ سے ایسے شخص پر لازم ہے کہ حق العبد میں گرفتار ہونے کی وجہ سے امام صاحب سے معافی مانگے۔ لیکن اس وجہ سے اس امام کے پیچھے پڑھی گئی نمازیں فاسد یا نامکمل نہ کہی جائیں گی جب کہ وہ نمازیں تمام شرائط و فرائض و واجبات کی رعایت سے ادا کی گئی ہوں۔واللہ سبحانہ وتعالی اعلم۔
کتبہ: محمد نظام الدین قادری: خادم درس و افتاء دارالعلوم علیمیہ جمدا شاہی، بستی، یوپی۔
۵/ذی الحجہ ١۴۴٢ھ//١۵/جولائی ٢٠٢١ء