گنبد خضرا یا کعبہ معظمہ کی فوٹو والے مصلے پر نماز پڑھنا کیسا ہے ؟

مفتی صاحب سوال یہ ہے کہ مصلے جو آج کل مارکیٹ میں ملتے ہیں ا ن پر گنبد خضرا یا کعبہ معظمہ کی فوٹو یا اس کا نقش ہوتا ہے تو اس پر نماز پڑھنے کے لیے کیا حکم ہوگا ؟ الجواب : جا نماز یا مصلوں پر جو گنبد نما نقوش ہوتے ہیں وہ ضروری نہیں کہ سب کے سب گنبد خضرا کے نقوش ہوں یا خانہ کعبہ کے نقوش ہوں، بہت سے نقشے ایسے ہوتے ہیں جو محض ذہنی اخترا ع ہوتے ہیں، ایجاد ہوتے ہیں اور ان کا بیت اللہ شریف ،خانہ کعبہ شریف اور گنبد خضرا شریف سے کوئی تعلق نہیں ہوتا تو ان کو بچھاکر ان پر نماز پڑھنے میں تو کوئی مضائقہ اور کوئی حرج نہیں ہے۔ رہ گئے خاص وہ مصلے اور جانماز جن پہ واقعی بیت اللہ شریف کا ،خانہ کعبہ شریف کا نقشہ ہو یا گنبد خضرا شریف کا نقشہ ہو تو ان پر بھی نماز پڑھنا پڑھنا جائز و درست ہے ۔بس یہ لحاظ رکھنا چاہیے کہ خاص گنبد خضرہ کے نقشے پر یا خانہ کعبہ کے نقشے پر پاؤں نہ پڑے نہ وہاں بیٹھیں ،پاؤں کی جگہ پر پاؤں رکھیں اور ان جگہوں پر اپنی پیشانی رکھیں تو اس میں کوئی حرج نہیں ہےیہ جائز و درست ہے ۔ واللہ تعالی اعلم کتبہ : مفتی نظام الدین صدر شعبہ افتا جامعہ اشرفیہ مبارک پور اعظم گڑھ ۔