شب برأت میں غسل کرنا کیسا ہے ؟

شب برأت میں غسل کرنا کیسا

السلام علیکم ورحمتہ اللہ وبرکاتہ مسئلہ:کیا فرماتے ہیں علمائے دین ومفتیان شـرع متین مسئلہ ذیل میں کہ شب برأت میں غسل کرنا کیا ہے؟ (سائل : محمد نور نظر کٹیہار) وعلیکم السلام ورحمتہ اللہ وبرکاتہ

الجواب بعون الملک العزیز الوھاب

شب برأت میں غسل کرنا مستحب ہے جیساکہ فقیہ اعظم ہندحضورصدرالشریعہ بدرالطریقہ علامہ مفتی محمدامجدعلی اعظمی علیہ الرحمةوالرضوان تحریرفرماتےہیں،، کہ جمعہ، عید، بقرعید، عرفہ کے دن اور احرام باندھتے وقت نہانا سنّت ہے اور وقوفِ عرفات و وقوفِ مزدلفہ و حاضریٔ حرم و حاضریٔ سرکا رِ اعظم و طواف ودُخولِ منیٰ اور جَمروں پر کنکریاں مارنے کے لیے تینوں دن اور شبِ برات اور شبِ قدر اور عَرفہ کی رات اور مجلسِ میلاد شریف اور دِیگر مجالسِ خیر کی حاضری کے لیے اور مردہ نہلانے کے بعد اور مجنون کو جنون جانے کے بعد اور غشی سے افاقہ کے بعد اور نشہ جاتے رہنے کے بعد اور گناہ سے توبہ کرنے اور نیا کپڑا پہننے کے لیے اور سفر سے آنے والے کے لیے، استحاضہ کا خون بند ہونے کے بعد، نماز کسوف و خسوف و اِسْتِسقاء اور خوف و تاریکی اور سَخْت آندھی کے لیے اور بدن پر نَجاست لگی اور یہ معلوم نہ ہوا کہ کس جگہ ہے ان سب کے لیے غُسل مستحب ہے۔ (تنویر الابصار الدرالمختار ج١ ص٣٤٢/٣٣٩) (بہار شریعت جلد اوّل صفحہ ٣٢٨/٣٢٧) واللہ تعالیٰ اعلم بالصواب کتبہ:محمد اشفاق عالم امجدی علیمی بچباری آبادپور کٹیہار الھند