نماز میں انگلی چٹکانا مکروہ تحریمی ہے

کیا فرماتے ہیں علمائے دین کہ نماز کے درمیان انگلی چٹکانا کیسا ہے؟ سائلہ سروری احمد رام گڑھ جھارکھنڈ انڈیا۔ اَلْجَوَابُ بِعَوْنِ الْمَلِکِ الْوَھَّاب صورت مستفسرہ میں انگلی چٹکانا مکروہ تحریمی ہے فتاوی ھندیہ میں ہے: ” وَيُكْرَهُ أَنْ يُشَبِّكَ أَصَابِعَهُ وَأَنْ يُفَرْقِعَ. كَذَا فِي فَتَاوَى قَاضِي خَانْ “ اھ ( جلد١ صفحہ١٠٦ کتاب الصلاۃ، الباب السابع فیما یفسد الصلاۃ وما یکرہ فیھا، الفصل الثاني ۔ دار الفکربیروت) بہار شریعت میں ہے :” انگلیاں چٹکانا، انگلیوں کی قینچی باندھنا یعنی ایک ہاتھ کی انگلیاں دوسرے ہاتھ کی انگلیوں میں ڈالنا، مکروہ تحریمی ہے ” اھ (حصہ سوم ، مکروہات کا بیان جلد١ صفحہ٦٢٥) حضور اعلی حضرت رضی اللہ تعالی عنہ تحریر فرماتے ہیں:” نماز میں انگلی چٹخانا گناہ وناجائز ہے “اھ (فتاویٰ رضویہ مترجم جلد اول حصہ ب صفحہ ١٠٢٢) واللہ تعالیٰ اعلم بالصواب۔ کتبہ : گدائے حضور رئیس ملت محمد صدام حسین برکاتی فیضی میرانی خادم میرانی دار الافتاء