کہا اپنی بیوی کو طلاق دی دی دی تو کونسی طلاق پڑی؟

کہا اپنی بیوی کو طلاق دی دی دی تو کونسی طلاق پڑی؟

مسئلہ:- از: حاجی عبد العزیز نوری ، ہاتھی پالا اندور ، ایم پی۔ کیا فرماتے ہیں علمائے دین و مفتیان شرع متین اس مسئلہ میں کہ زید نے کہا میں نے اپنی بیوی کو طلاق دی دی دی تو کون سی طلاق واقع ہوئی؟ الجوابـــــــــــــــــــــــــــ لفظ دی کی تین بار تکرار سے طلاق مغلظہ واقع ہو جاتی ہے ۔ ایسا ہی فتاویٰ رضویہ جلد پنجم صفحہ ٦٥٩ پر ہے ۔ لہذا اگر وہ زید کی مدخولہ ہے تو اس پر طلاق مغلظہ پڑ گئی اب زید بغیر حلالہ اس سے نکاح نہیں کر سکتا ۔۔ قال الله تعالى :” فان طلقها فلا تحل له من بعد حتى تنكح زوجا غيره.” (ب۲ سورہ بقرہ آیت ۲۳۰) اور اگر وہ غیر مدخولہ ہے تو ایک طلاق بائن پڑی۔ حضرت علامہ حصکفی رحمۃ اللہ تعالی علیہ تحریر فرماتے ہیں :” قال لزوجته غير المدخول بها انت طالق ثلاثا وقعن وان فرق بانت بالاولي .” اس صورت میں عورت کی مرضی سے نئے مہر کے ساتھ دوبارہ نکاح کر سکتا ہے حلالہ کی ضرورت نہیں. والله تعالى اعلم بالصواب. الجواب الصحيح: جلال الدين احمد الامجدي كتبــــــــــــــــــه: محمد عبد الحي قادري